iCloud គឺជាមុខងាសុវត្ថិភាពដ៏ខ្ពស់មួយរបស់ iOS
ដែលអាចរក្សាទុករូបភាព ឯកសារផ្សេងៗបាន
ហើយថែមទាំងអាចរក្សាទូរស័ព្ទរបស់យើងអោយក្លាយទៅជាដុំថ្មថែមទៀត
ផង។ មានមូលហេតុជាច្រើន ដែលអាចបង្កអោយ iPhone, iPad, និង
iPod Touch របស់យើង គាំងសួររក Apple ID បាន
ហើយអ្នកទាំងអស់គ្នាគួរតែដឹងអោយច្បាស់ផងដែរ
ចៀសវាងជួបវានៅថ្ងៃមុខ។ ខាងក្រោមនេះគឺជារឿងរ៉ាវមួយចំនួន
ដែល Cambo Report បានប្រទះជួបដោយផ្ទាល់
និងបានលឺជនរងគ្រោះរ៉ាយរ៉ាប់ប្រាប់។
1. មុននឹងទិញ iDevice មួយទឹកពីនរណាម្នាក់ សូមអោយគេ Restore ទូរស័ព្ទអោយថ្មីសិន
ទីផ្សារ iDevice
មួយទឹកនៅស្រុកខ្មែរយើងគឺមានភាពទូលំទូលាយខ្លាំងណាស់ ហើយមួយថ្ងៃៗ
iDevice មួយទឹក រាប់រយ រាប់ពាន់គ្រឿង ត្រូវបានទិញចេញ និងចូល។
មុននឹងអ្នកទិញ iDevice មួយទឹកពីនរណាម្នាក់ អ្នកត្រូវអោយគេ
Restore Software អោយថ្មីសិន
ទោះបីជាអ្នកលក់ប្រាប់អ្នកថាវាគឺជារបស់ថ្មីក៏ដោយ។
បន្ទាប់ពីគេ Restore ថ្មីហើយ សូមចូលទៅឆែក iClouds Account
ម្តងទៀត ក្រែងលោវានៅជាប់ ដោយចូលទៅកាន់ Setting > iClouds។
បើវាមាននៅជាប់ វានឹងបង្ហាញ Apple ID មួយនៅទីនោះ
តែបើគ្មានទេ វានឹងទទេស្អាត។ ដោយឡែក សូមទិញវាពីហាង
រឺនរណាម្នាក់ដែលទុកចិត្តបំផុត
ចៀសវាងទិញពីមនុស្សដែលអ្នកមិនស្គាល់មុខ។
2. សូមប្រើប្រាស់ Apple ID មួយផ្ទាល់ខ្លួន និងបង្កើតដោយខ្លួនឯង រឺអ្នកទុកចិត្តបំផុត
Apple ID គឺប្រៀបបានដូចជាគណនីធនាគាររបស់យើងអញ្ជឹង
ដែលយើងត្រូវតែរក្សាអោយសំងាត់បំផុត
ហើយមិនត្រូវអោយនរណាដឹងឡើយ។ ប្រសិនបើអ្នកប្រើប្រាស់ Apple ID
របស់អ្នកដទៃ រឺក៏ពឹងអោយគេបង្កើតអោយ
នោះអ្នកអាចជួបបញ្ហានៅថ្ងៃមុខទៀតជាក់ជាមិនខាន
ដោយអ្នកអាចនឹងភ្លេច រឺក៏ Apple នោះវាខូច។
ប្រសិនបើអ្នកប្រើប្រាស់ Apple ID ខ្លួនឯងនោះ
នៅពេលដែលវាគាំងអោយវាយបញ្ចូល Apple ID
នោះអ្នកនឹងអាចដោះបានយ៉ាងងាយស្រួល និងមិនមានបញ្ហាឡើយ
ទោះបីជាភ្លេច Password ក៏អ្នកអាច Reset ថ្មីបានដែរតាមរយៈ
Email។ ប្រសិនបើអ្នកមិនទាន់ចេះបង្កើត Apple ID ដោយខ្លួនឯងទេ
អ្នកអាច ចុចទីនេះ ដើម្បីយល់ដឹងពីរបៀបបង្កើត។
3. ប្រយ័ត្នមានអ្នកចង់ធ្វើបាបយើង ដោយដាក់ Apple ID របស់គេមកលើទូរស័ព្ទយើង
បញ្ហាមួយនេះក៏មានច្រើនដែរ នៅក្នុងប្រទេសកម្ពុជាយើង
ដែលមានមនុស្សគំនិតអាក្រក់មួយចំនួនចង់ធ្វើបាបយើង។
បងប្រុសម្នាក់រៀបរាប់ពីរឿងរ៉ាវរបស់គាត់
ដែលជាដំបូងគាត់បានទិញ iPhone 5S ថ្មីទើបតែបកចេញពីសំបក
ហើយគាត់ក៏បានទៅតូបមួយដើម្បីបញ្ចូលចម្រៀង។
គាត់បានឃើញអ្នកបញ្ចូលចម្រៀងចុចទូរស័ព្ទគាត់ចុះឡើងៗ
ហើយគាត់ក៏មិនសូវចាប់អារម្មណ៍ច្រើនដែរ។
បន្ទាប់ពីបញ្ចូលចម្រៀងចប់ហើយ គាត់ក៏បានយកទូរស័ព្ទគាត់វិញ
ប៉ុន្តែនៅកន្លែង iClouds មានជាប់គណនី Apple ID
របស់នរណាម្នាក់មិនដឹង។
ម្ចាស់ទូរស័ព្ទបានសួរដេញដោលទៅកាន់អ្នកបញ្ចូលចម្រៀងចុះឡើងៗ
ហើយក៏បានគំរាមប្តឹងផងដែរ ទីបំផុតអ្នកបញ្ចូលចម្រៀងបានឆ្លើយថា
ចាំគាត់មើលអោយ ហើយមួយនាទីក្រោយមកវាក៏បាត់ទៅវិញ។
ករណីនេះបានបង្ហាញយើងអោយឃើញថា
មានជនខិលខូចមួយចំនួនចង់ធ្វើបាបអ្នក ដោយដាក់ Apple ID
របស់គេទៅលើទូរស័ព្ទអ្នក
ហើយនៅថ្ងៃមួយទូរស័ព្ទអ្នកនឹងជាប់គាំង Apple ID
បន្ទាប់មកទៀតគេមានសមត្ថភាពអាចដោះអោយយើងបានក្នុងតម្លៃដែលគេ
កំណត់មួយ ដូចជា 50$ រឺកី 80$ ជាដើម
រឺក៏ទិញទូរស័ព្ទយើងកាប់សាច់តែម្តងក្នុងតម្លៃ 200 រឺ 300$។
ដូច្នេះលោកអ្នកគួរតែដាក់ Apple ID របស់អ្នកទៅក្នុង iDevice
សិន
ហើយបន្ទាប់ពីនរណាម្នាក់ដែលយើងមិនទុកចិត្តប៉ះពាល់ទូរស័ព្ទរបស់
យើង សូមមេត្តាឆែកឆេរព៌តមាន Apple ID
អោយបានហ្មត់ចត់ចៀសវាងមានបញ្ហាថ្ងៃមុខ។
សរុបសេចក្តីមក បញ្ហាជាប់គាំង iCloud Activation
គឺជាបញ្ហាដ៏ធ្ងន់ធ្ងរមួយ ហើយអ្នកទាំងអស់គ្នាគួរតែយល់ដឹង
នឹងកុំអោយក្លាយជាជនរងគ្រោះឡើយ ព្រោះអីនាពេលបច្ចុប្បន្ននេះ
មិនទាន់មាននរណាអាចដោះវាបានឡើយ។
ហើយប្រសិនបើអ្នកចង់លក់ទូរស័ព្ទដែលជាប់ ID
បែបនេះគឺបានតម្លៃថោកណាស់ ប្រមាណជា 150$ ប៉ុណ្ណោះសម្រាប់
iPhone 5 រីឯ 5S វិញប្រហែល 180$ ។
Post a Comment