ដើម្បីធ្វើជាអ្នកបញ្ចូលបទភ្លេង ហ្គេម និងកម្មវិធីទូរស័ព្ទបាន តើត្រូវមានសមត្ថភាពអ្វីខ្លះទៅ?

មុខរបរអ្នកបញ្ចូលបទភ្លេង-កម្មវិធី និងហ្គេម ទូរស័ព្ទកំពុងតែ រីកដុះដាល ខ្លាំងនាពេល បច្ចុប្បន្ននេះ ស្របនឹងកំណើន អ្នកប្រើប្រាស់ ទូរស័ព្ទដែលកំពុង កើតឡើងដែរ ហើយយើង សង្កេតឃើញថា មុខរបរមួយនេះ បានជួយផ្តល់កម្រៃ ប្រចាំថ្ងៃបានច្រើន គ្រាន់បើដែរ។ ដោយសារតែ មុខងារបរនេះ វាមានភាពងាយស្រួល ក្នុងការរកកម្រៃ ណាមួយចំណាយ ដើមទុនតិចនោះ វាពិតជាមាន ភាពប្រកួតប្រជែង ខ្លាំងណាស់ ដែលតម្រូវអោយ អ្នកប្រកបរបរនេះ ត្រូវមានជំនាញ ខ្ពស់បន្តិច និងសេវាកម្មល្អ ទើបមុខរបរ ដំណើរការបានទៅ ដោយរលូន។ ប្រសិនបើអ្នកកំពុងតែប្រកបរបរនេះហើយ រឺមានបំណង និងចង់សិក្សាស្វែងយល់ថា តើមុខរបរនេះ វាទាមទារអោយយើង ចេះនូវអ្វីខ្លះនោះ អ្នកទាំងអស់គ្នា អាចសិក្សាស្វែងយល់ជាមួយយើងបាន។

មុខរបរមួយនេះ គឺវាទាក់ទងទាំងអស់ ទៅនឹងផ្នែក Software មិនចាំបាច់ ទាមទារអោយ យើងចេះ ជួសជុល ដោះដូរ គ្រឿងបន្លាស់ អ្វីនោះទេ ហេតុដូច្នេះហើយ យើងត្រូវការតែកុំព្យូទ័រ ល្មមប្រើ មួយគ្រឿង ប៉ុណ្ណោះ ហើយបើមានភ្ជាប់ ទៅកាន់អ៊ីនធឺណែតទៀត គឺកាន់តែល្អ។ មុខរបរនេះ គឺវាទាមទារអោយយើង ចេះបញ្ចូល បទចម្រៀង និងវីដេអូ បទសម័យ, បុរាណ បទជាតិ រឺអន្តរជាតិ ទៅតាមការ កុម្ម៉ង់របស់អតិថិជន។ យើងក៏ត្រូវចេះ បញ្ចូលហ្គេម កម្មវិធី ល្អៗ និងពេញនិយម វចនានុក្រមអេឡិចត្រូនិច ផងដែរ មិនថា លើទូរស័ព្ទ Android ក្តី iPhone ក្តី និងទូរស័ព្ទ ធម្មតាៗនោះទេ។
កាន់តែស៊ីជម្រៅថែមទៀតនោះ មុខរបរនេះ ក៏ទាមទារ អោយយើងចេញ បន្ទាន់សម័យ (Update) ប្រព័ន្ធប្រតិបត្តិការណ៍ ទូរស័ព្ទ ផងដែរ មិនថាពពួក iPhone , iPad ក្តី មិនថាពពួក ទូរស័ព្ទ Android ដែលមានដូចជា Samsung, Sony, LG, HTC … ក្តី។ យើងក៏បាច់ត្រូវចេះ Jailbreak, Restore, ទំលាក់ Version iOS (ឧបករណ៍ចាស់ៗ) បង្កើត Apple ID, ដោះស្រាយបញ្ហា iPhone គាំង ប្រើមិនកើតនោះ ជាដើម ព្រោះអីអតិថិជន មួយចំនួន ឧស្សាហ៍ជួបប្រទះ នឹងបញ្ហានេះ។ ទូរស័ព្ទ Android គឺវាមានច្រើន ម៉ូដច្រើនម៉ាក ហើយវាក៏មិនសូវងាយស្រួល ក្នុងការតម្លើង Version ប៉ុន្មានទេ ហេតុដូច្នេះហើយ យើងគប្បីចេះបុកតម្លើង Version ដោយប្រើប្រាស់ Custom Roms ( Rom ច្នៃ ) ចេះផ្តាច់ពពួក ទូរស័ព្ទកូរ៉េ អោយស្រួលប្រើ ចេះ Repair Boot និង ចេះ Root ជាដើម។ ជំនាញទាំងអស់នេះ មិនសូវងាយស្រួល ប៉ុន្មានទេ ប៉ុន្តែប្រសិនបើ អ្នកចេះស្ទាត់ អ្នកនឹងមានឱកាស ច្រើននៅក្នុង មុខរបរនេះ។

មុខរបរនេះពិតជាមានភាពងាយស្រួល ប្រសិនបើអ្នកមានជំនាញច្បាស់លាស់ ទាក់ទងទៅនឹង Software របស់ទូរស័ព្ទនេះ ដោយមិនត្រឹមតែ ចេះបញ្ចូល បទចម្រៀង-វិដេអូ កម្មវិធី និងហ្គេម នោះទេ។ សេវាកម្មល្អ រួសរាយរាក់ទាក់ និងស្មោះត្រង់ចំពោះ អតិថិជន ក៏នឹងជួយអោយមុខ របរនេះឆាប់រីកចម្រើន ទៅមុខបាន ផងដែរ។
ទាំងនេះ គ្រាន់តែជាយោបល់របស់យើង តែប៉ុណ្ណោះ ទាក់ទងទៅនឹង តម្រូវការនានា ដើម្បីក្លាយទៅជាអ្នកបញ្ចូល ចម្រៀង បុក Program និង ហ្គេមដ៏ជំនាញម្នាក់។ បន្ថែមពីលើតម្រូវការទាំងនេះទៀត អ្នកទាំងអស់គ្នា ក៏គប្បីតាមដាន ពត៌មានបច្ចេកវិទ្យាថ្មីៗ ជានិច្ចផងដែរ និងសិក្សានូវ អ្វីដែលថ្មីៗជានិច្ច តាមរយៈអ៊ីនធឺណែត ព្រោះអីគ្រឿងអេឡិចត្រូនិច ដូចជាស្មាតហ្វូន ថេប្លេតនេះ គឺវាដើរវិវត្តន៍ទៅមុខ ជានិច្ច ដែលតម្រូវអោយយើង ធ្វើការសិក្សាវា អោយទាន់ ដំណើររបស់វា (Up to date)។