ការពីប៉ុន្មានឆ្នាំមុន ការផ្ញើសារអេឡិចត្រូនិចពិតជាមានការពេញនិយម
និងមានសារៈសំខាន់ខ្លាំងណាស់ សម្រាប់មនុស្សជុំវិញពិភពលោក។
វាមានការប្រើប្រាស់យ៉ាងទូលំទូលាយ
និងជួយសម្រួលក្នុងកិច្ចការរបស់មនុស្ស បានយ៉ាងច្រើន
មិនថាការទំនាក់ទំនងគ្នា ការផ្ញើឯកសារការងារ មេរៀន
និងការជជេកកម្សាន្តខ្លះនោះទេ ថែមទាំងមានលទ្ធភាពរក្សានូវ
ប្រព័ន្ធសុវត្ថិភាពទៀតផង។ ដូចដែលយើងបានដឹងស្រាប់ហើយ
សារអេឡិចត្រូនិចដែលមានការគាំទ្រពីសំណាក់អ្នកប្រើប្រាស់បានច្រើន
ជាងគេនោះ បានទៅលើក្រុមហ៊ុន Yahoo និង Gmail របស់ Google។
ក្រុមហ៊ុនទាំងពីរនេះបានផ្គត់ផ្គង់នូវប្រព័ន្ធសារអេឡិចត្រូនិច
ដែលមានភាពងាយស្រួលក្នុងការប្រើប្រាស់
និងមានប្រព័ន្ធសុវត្ថិភាពខ្ពស់ដល់អតិថិជនរបស់ពួកគេ។
ប៉ុន្តែដោយសារវិស័យបច្ចេកវិទ្យាចេះតែលូតលាស់ទៅ អ្នកអភិវឌ្ឍកម្មវិធី
បានខិតខំរកអ្វីដែលថ្មី
ក្នុងការសម្រួលដល់ការងាររបស់មនុស្សឲ្យកាន់តែមានភាពងាយស្រួល
និងបានរហ័សជាងមុន ក្នុងពេលនោះដែរ វត្តមានរបស់ Facebook
ត្រូវបានបង្កើតឡើងថ្មី
ក្នុងមុខងារជំរុញឲ្យមានភាពងាយស្រួលក្នុងការរស់នៅ
និងការទំនាក់ទំនងគ្នារបស់មនុស្ស
ក៏ដូចជាបំពេញនូវចន្លោះប្រហោង របស់ Gmail និង Yahoo ។
នៅពេលដែល Facebook ត្រូវបានបង្កើតថ្មីៗ មនុស្សមួយចំនួនធំ
មិនបានស្គាល់ពីវានោះទេ ប៉ុន្តែរយៈប្រហែលជា 1-2 ឆ្នាំក្រោយមក
Facebook
ចាប់ផ្តើមមានប្រជាប្រិយភាពជាខ្លាំងនៅក្នុងបណ្តាញអ៊ីនធើណេត
ដែលមានចំនួនអ្នកប្រើប្រាស់យ៉ាងច្រើន
និងតួលេខនៃចំនួនអ្នកចុះឈ្មោះថ្មីៗក៏មានការកើនឡើងពីមួយថ្ងៃ
ទៅមួយថ្ងៃ។ ការកើនឡើង គួរឲ្យកត់សម្គាល់បែបនេះហើយ
ទើបយើងអាចសន្និដ្ឋានបានថា Facebook ពិតជាមានលក្ខណៈពិសេសច្រើន
និងអាចបំពេញមុខងាររបស់អ្នកប្រើប្រាស់ប្រចាំថ្ងៃយ៉ាងមាន
ប្រសិទ្ធភាព។ Facebook អាចជួយបំពេញការងាររបស់មនុស្សជាច្រើនដូចជា៖
- មាន Interface ស្រស់ស្អាត និងគួរឲ្យចាប់អារម្មណ៍
- ផ្តល់ការទំនាក់ទំនងបានយ៉ាងរហ័ស មិនថាឆ្លងប្រទេសឬឆ្លងទ្វីបនោះឡើយ
- អាចធ្វើការបង្ហាញ អារម្មណ៍តាមរយៈអក្សរ រូបភាព និងបង្ហោះជាវីដេអូបានទៀតផង
- អាចមើលឃើញនូវរាល់សកម្មភាពរបស់មនុស្សជាទីស្រឡាញ់មិនថាជា គ្រួសារ ឬក៏មិត្តភក្កិនោះទេ ឲ្យតែមាននៅក្នុងបញ្ជីឈ្មោះមិត្តភក្កិរបស់អ្នក
- ផ្តល់ភាពងាយស្រួល និងឆាប់រហ័សក្នុងការផ្ញើឯកសារ មិនថាឯកសារការងារ រឺមេរៀននោះទេ
- អាចធ្វើការជជេកកម្សាន្ត (Chat) បានយ៉ាងឆាប់រហ័ស
- អាចធ្វើការ Call ជាសម្លេង
- មានលទ្ធភាពក្នុងការបង្កើតជាក្រុម សម្រាប់មនុស្សដែលអ្នកឧស្សាហ៍ក្នុងការទាក់ទង
- អាចជួយសម្រួលក្នុង ការផ្សព្វផ្សាយពាណិជ្ជកម្មបានថែមទៀតផង
- អាចធ្វើការទំនាក់ទំនងទៅកាន់មនុស្សច្រើនក្នុងពេលតែមួយ
មកដល់បច្ចុប្បន្ននេះ Facebook បានក្លាយជាបណ្តាញសង្គមមួយដ៏ធំ
ដែលមានចំនួនអ្នកប្រើប្រាស់យ៉ាងច្រើនលើសលប់
ដល់ទៅរាប់ពាន់លានគណនីឯណោះ។ ការប្រើប្រាស់ Facebook
ពិតជាមានភាពទូលំទូលាយខ្លាំងមែនទែននៅជុំវិញពិភពលោក
មិនថាមនុស្សចាស់ យុវវ័យ ឬក៏មនុស្សវ័យជំទង់នោះទេ
សឹងតែមានគណនី Facebook គ្រប់គ្នាទៅហើយ។ Facebook
ក៏បានទាញយកចំណូលបានយ៉ាងក្រាស់ក្រែលផងដែរ
ពីគុណសម្បត្តិនៃការប្រើប្រាស់ដ៏លើសលប់របស់មនុស្សនេះ។
ទន្ទឹមនឹងការកើនឡើងនៃចំនួនអ្នកប្រើប្រាស់ Facebook,
ការប្រើប្រាស់សារអេឡិចត្រូនិច (Email) មានការថយចុះច្រើន
ប៉ុន្តែមិនមានន័យថាចំនួនគណនីអ្នកដែលប្រើប្រាស់ Email
មានការថយចុះនោះទេ មានតែកើនឡើងដូចទៅនឹង Facebook ដែរ
ព្រោះលក្ខខណ្ឌក្នុងការចុះឈ្មោះគណនីរបស់ Facebook
តម្រូវឲ្យបំពេញនូវ Email Address ណាមួយផងដែរ។
បើតាមការសង្កេតបានឲ្យដឹងថាអ្នកខ្លះចុះឈ្មោះគណនី Email
ពិតមែនប៉ុន្តែ សម្រាប់ប្រើក្នុងការចុះឈ្មោះបន្តទៅក្នុងគណនី
Facebook តែប៉ុណ្ណោះ មិនដែលសូវប្រើប្រាស់ Email នោះទេ។
នេះសបញ្ជាក់ឲ្យឃើញថាថ្វីត្បិតតែមានចំនួនគណនីកើនឡើងដូចគ្នាពិតមែនរវាង
សារ អេឡិចត្រូនិច (Email) និង (Facebook) ប៉ុន្តែការប្រើប្រាស់
Facebook ក្នុងមធ្យោបាយទំនាក់ទំនង
និងផ្ញើឯកសារមានការប្រើប្រាស់យ៉ាងច្រើនលើសលប់
និងមានប្រសិទ្ធភាព។ Facebook បានកាត់បន្ថយការប្រើប្រាស់ Email
ក៏ពិតប្រាកដមែន ប៉ុន្តែក្រុមហ៊ុនធំៗ និងស្ថាប័នមួយចំនួន
នៅតែបន្តការប្រើប្រាស់សារអេឡិចត្រូនិចមួយនេះ
ព្រោះវាមានសុវត្ថិភាពខ្ពស់ និងត្រូវបានលាក់ការយ៉ាងសម្ងាត់
នៅរាល់កិច្ចសន្ទនានៅក្នុងសារ និងឯកសារជាដើម។
Post a Comment