ប្រព័ន្ធប្រតិបត្តិការណ៍ Android និង iOS
គឺជាប្រព័ន្ធប្រតិបត្តិការណ៍សម្រាប់ទូរស័ព្ទ
និងថេប្លេតដែលស្ថិតនៅលំដាប់កំពូលមួយ
ដែលវាពោរពេញទៅដោយមុខងារពិសេសៗ
និងមានហ្គេមនិងកម្មវិធីជាច្រើនយ៉ាងណាក៏ដោយ។ អ្នកប្រើប្រាស់
Android និង iOS តែងតែពិភាក្សាគ្នាជារឿយៗ
ហើយពេលខ្លះក៏តឹងសរសៃកដាក់គ្នាផងដែរ ទាក់ទិននឹងកង្វះខាត
និងភាពអន់ខ្សោយរបស់ប្រព័ន្ធប្រតិបត្តិការណ៍ទាំងពីរនេះ
ហើយលទ្ធផលគឺយើងមិនអាចកាត់សេចក្តីបាននោះទេ
ព្រោះអីលក្ខណៈពិសេសៗវាមានភាពផ្សេងគ្នា
ដែលយើងមិនអាចយកមកប្រៀបជាមួយគ្នាបាននោះទេ។
ថ្ងៃនេះ យើងនឹងលើកយករឿងទាំងប្រាំយ៉ាង ដែលអ្នកប្រើប្រាស់ទូរស័ព្ទ
Android នឹងឈឺក្បាល ប្រសិនបើជាគេផ្លាស់ប្តូរទៅប្រើ iPhone វិញ។
យើងជឿថា ប្រិយមិត្តមួយចំនួនប្រាកដជាជួបប្រទះនូវបញ្ហានេះ
ដូច្នេះសូមតាមដានទាំងអស់គ្នាថាតើមុខងាររបស់ iOS អ្វីខ្លះ
ដែលអាចអោយអ្នកប្រើទូរស័ព្ទ Android
ជាយូរមកហើយមានភាពឈឺក្បាលនោះ។
មុខងារ Sharing របស់ iOS គឺខុសគ្នាទាំងស្រុងជាមួយ Android
នៅលើប្រព័ន្ធប្រតិបត្តិការណ៍ iOS អ្នកអាចចែកចាយរូបភាព រឺវីដេអូ
រឺឯកសារផ្សេងៗបានត្រឹមតែតាមរយៈ សារ អ៊ីម៉ែល Twitter Facebook និង
Airdrop តែប៉ុណ្ណោះ ខុសពី Android
ដែលយើងមានជម្រើសអាចចែកចាយទៅកាន់កម្មវិធី ជាច្រើន
តាមតម្រូវការមាន Dropbox, Youtube, Google Drive, Bluetooth … ។
នេះគឺជាចំណុចដ៏ពិសេសមួយរបស់ប្រព័ន្ធប្រតិបត្តិការណ៍ Android
ដែលមនុស្សជាច្រើនពេញចិត្ត។
របារបង្ហាញដំណឹង និងពត៌មានរបស់ iOS មានភាពរញ៉េរញ៉ៃ
របារបង្ហាញពត៌មាននេះមានបំពាក់លើប្រព័ន្ធប្រតិបត្តិការណ៍ Android
តាំងពីដំបូងមកម្ល៉េះ
វាក៏បានបង្ហាញខ្លួនលើប្រព័ន្ធប្រតិបត្តិការណ៍ iOS ទៀតនៅចុងឆ្នាំ
2011។ ទោះបីជាយ៉ាងណាក៏ដោយ រចនាបថរបស់របារពត៌មានរវាង iOS និង
Android គឺខុសគ្នាទាំងស្រុង ដោយ iOS មានភាពសាំញ៉ាំ
និងពិបាកប្រើប្រាស់ជាង។ ក្នុងនោះមានបែងចែកជាបីក្រឡោនគឺ Today,
All និង Missed។ សូម្បីតែខ្ញុំផ្ទាល់ដែលកំពុងតែប្រើប្រាស់ iOS
ក៏មិនសូវចេះប្រើ Notification Centre បានស្ទាត់នៅឡើយទេ
ព្រោះអីរាល់ដំណឹងផ្សេងៗគឺបង្ហាញស្អេកស្កះ ពិបាកក្នុងការមើល។
លើសពីនេះទៅទៀត វាមិនមានជម្រើស
លុបទាំងអស់ដូចនៅលើប្រព័ន្ធប្រតិបត្តិការណ៍ Android នោះទេ។
កម្មវិធី និងមុខងារជាច្រើន មិនអាចប្រើជាលក្ខណៈអេក្រង់ផ្តេក
កម្មវិធី និងមុខងារមួយចំនួនរបស់ iOS
មិនអាចប្រើជាលក្ខណៈផ្តេកដូចទៅនឹង iOS នោះទេ។
ដូច្នេះហើយអ្នកប្រើប្រាស់ iOS
មួយចំនួនគឺត្រូវប្រើទូរស័ព្ទជាលក្ខណៈបញ្ឈររហូត
នេះអាចមកពីរូបរាងរបស់ iPhone
បង្កើតឡើងសម្រាប់ប្រើជាលក្ខណៈបញ្ឈរ។ ផ្ទុយពីទូរស័ព្ទ Android
ដែលមុខងារ
និងកម្មវិធីមួយចំនួនសុទ្ធតែអាចប្រើជាលក្ខណៈផ្តេកក៏បាន
បញ្ឈរក៏បានដោយសេរី។
គ្មានសារបង្ហាញប្រាប់ថា កម្មវិធី រឺមុខងារណាប្រើប្រស់ថ្មអស់ប៉ុន្មានភាគរយ
ប្រព័ន្ធប្រតិបត្តិការណ៍ Android
មានមុខងារមួយដែលវានឹងរាយការណ៍ប្រាប់ថាតើកម្មវិធី
រឺមុខងារណាខ្លះដែលប្រើប្រាស់ថ្មអស់ប៉ុន្មានភាគរយ។
មុខងារនេះនឹងជួយដាស់តឿនយើងកុំអោយប្រើកម្មវិធី
និងមុខងារនោះញឹកញាប់ពេក ដើម្បីថែរក្សាថ្ម។ ប៉ុន្តែ iOS
វិញមិនមានមុខងារនេះទេ
ដែលតម្រូវអោយយើងធ្វើការតាមដានដោយខ្លួនឯង។ យ៉ាងណាមិញ ចាប់ពី
iOS 8 ឡើងទៅ មុខងារនេះនឹងមានបំពាក់លើ iPhone និង iPad ហើយ។
គ្មានកម្មវិធីផ្ទុកឯកសារ ( File Manager)
អ្នកដែលទើបតែប្រើប្រាស់ iOS លើកដំបូង សុទ្ធតែមានភាពភ្ញាក់ផ្អើល
នៅពេលដែលគេដឹងថា វាមិនមានមុខងារបើកមើលឯកសារ
នានានៅលើទូរស័ព្ទនោះទេ។ ហេតុដូច្នេះហើយរាល់ការចង់ដោនឡូដចម្រៀង
វីដេអូផ្សេងៗ គឺនឹងត្រូវផ្ទុកទៅលើកម្មវិធីណាមួយ
មិនមែនមកលើកម្មវិធី Music រឺ Video នោះទេ។
ប៉ុន្តែសម្រាប់អ្នកដែលបាន Jailbreak ឧបករណ៍របស់គេរួច
អាចនឹងមានភាពងាយស្រួលជាងមុន ដោយគ្រាន់តែតម្លើងកម្មវិធី iFile។
ខាងលើនេះគ្រាន់តែជាបញ្ហាមួយចំនួនដែលអ្នកប្រើប្រាស់ទូរស័ព្ទ Android
ជាច្រើនឆ្នាំ បានផ្លាស់ប្តូរទៅប្រើ iOS តែប៉ុណ្ណោះ
ប៉ុន្តែជាក់ស្តែងនៅសល់បញ្ហាជាច្រើនទៀត។
ទោះបីជាប្រព័ន្ធប្រតិបត្តិការណ៍ iOS មិនសូវមានមុខងារច្រើន
និងទូលំទូលាយដូច Android ប៉ុន្មានទេ
តែអ្នកប្រើប្រាស់ភាគច្រើននៅតែពេញចិត្តទៅនឹងវា
ព្រោះអីវាមានភាពសាមញ្ញ ល្បឿនលឿន បើប្រៀបជាមួយ Android។
តើអ្នកទាំងអស់គ្នាមានយោបល់យ៉ាងណាដែរចំពោះបញ្ហាទាំងប្រាំខាងលើ
នេះ?
តើអ្នកទាំងអស់គ្នាធ្លាប់ជួបប្រទះនឹងបញ្ហាទាំងនេះដែររឺទេ?
Post a Comment