រឿងពិសេសទាំងប្រាំមួយយ៉ាងរបស់ Android ដែលអ្នកអាចនឹងមិនធ្លាប់លឺពីមុនមក

Android Android Android ពាក្យនេះបានចាប់ផ្តើមល្បីតៗគ្នាចាប់តាំងពីឆ្នាំ 2008 មកព្រោះអីទូរស័ព្ទដែលដំណើរការដោយប្រព័ន្ធប្រតិបត្តិការណ៍ Android វាអាចដំណើរការបានល្អ មានមុខងារច្រើន ហើយវាក៏មានច្រើនម៉ាក ច្រើនម៉ូត គ្រប់តម្លៃអាស្រ័យទៅលើអ្វីដែលយើងអាចចំណាយបានផងដែរ។ អស់រយៈពេលប្រាំមួយឆ្នាំមកនេះ Android ពិតជាទទួលបានភាពជោគជ័យខ្លាំងណាស់ នឹងបានក្លាយទៅជាប្រព័ន្ធប្រតិបត្តិការណ៍សម្រាប់ស្មាតហ្វូនលេខរៀង ទីមួយឯណោះ ហើយឧបករណ៍ច្រើនជាងមួយពាន់លានគ្រឿងកំពុងតែប្រើប្រាស់វា។

តើអ្នកណាខ្លះជាអ្នកគាំទ្រឧបករណ៍ Android? ខាងក្រោមនេះគឺរឿងពិសេសៗទាំងប្រាំមួយទាក់ទងនឹងប្រព័ន្ធ ប្រតិបត្តិការណ៍ Android ដែលអ្នកអាចនឹងមិនធ្លាប់បានលឺពីមុនមក។

1. Android គ្រោងបង្កើតឡើងសម្រាប់បំពាក់លើកាមេរ៉ា

ដំបូងឡើយលោក Andy Rubin បានខិតខំបង្កើតប្រព័ន្ធប្រតិបត្តិការណ៍ Android សម្រាប់កាមេរ៉ានោះទ ដោយប្រើប្រាស់វិស្វកម្ម Linux ប៉ុន្តែដោយសារគាត់ខ្វះកម្លាំង ណាមួយទៀតក៏ខ្វះថវិកានោះ គាត់ក៏បានស្វែងរកជំនួយពីក្រុមហ៊ុនៗធំៗជាច្រើនដូចជា Samsung និង Google ជាដើម ហើយទីបំផុត Google ក៏បានទទួល និងបង្កើតវាសម្រាប់ដំណើរការលើទូរស័ព្ទវិញ។

2. គូរប្រកួតរបស់ Android បានសើចចំអកចំពោះវត្តមានខ្លួនដំបូង

នៅពេលដែល Android បានបង្ហាញខ្លួនជាផ្លូវការក្នុងឆ្នាំ 2007 ក្រុមហ៊ុនដែលបង្កើតប្រព័ន្ធប្រតិបត្តិការណ៍ Symbian (Nokia), Windows Phone, BlackBerry, Palm មិនសូវចាប់អារម្មណ៍ប៉ុន្មាននោះទេ ផ្ទុយទៅវិញមានតែឆ្លើយតបនូវសារសើចចំអកទៅវិញ។ ក្រុមហ៊ុនទាំងនេះបានមើលស្រាល Android ពេកហើយ ហើយឥលូវពួកគេបានដឹងច្បាស់ហើយថានរណាខ្លាំង អ្នកណាខ្សោយ។

3. Android គឺជាប្រព័ន្ធប្រតិបត្តិការណ៍ដែលរីកចម្រើនលឿនជាងគេក្នុងប្រវិត្តសាស្ត្រ

Android បានផ្លាសប្តូរពិភពលោកជាខ្លាំង ព្រោះអីវាអាចដំណើរការបានលើគ្រប់ស្មាតហ្វូនទាំងអស់ ទាំងថោកទាំងថ្លៃ ហេតុដូច្នេះហើយបានជាកំណើនអ្នកប្រើប្រាស់វាបានកើនឡើងខ្ពស់ជា ខ្លាំង ពីមួយឆ្នាំទៅមួយឆ្នាំ ហើយរាប់មកដល់ឆ្នាំ 2013 ឧបករណ៍ដែលប្រើប្រាស់ Android បានកើនឡើងដល់ 1 ពាន់លានគ្រឿងហើយ។ ដែលជាចំនួនដ៏ច្រើនសន្ធឹកសន្ធាប់មួយខណៈ iOS មានចំនួន 700 លានឧបករណ៍ និង Symbian មានចំនួន 450 លានឧបករណ៍ (ចំណាយពេល 11ឆ្នាំ)។

4. Android កំពុងតែដំណើរការលើឧបករណ៍ជាច្រើនប្រភេទ

Android មិនត្រឹមតែអាចប្រើបានលើទូរស័ព្ទ និងថេប្លេតនោះទេ តែសូម្បីតែនាឡកាដៃ ទូរទស្សន៍ និងរថយន្តក៏អាចដំណើរការដោយប្រព័ន្ធប្រតិបត្តិការណ៍ Android ផងដែរ។ លើសពីនេះទៅទៀត យើងក៏អាចតម្លើង Android ប្រើលើកុំព្យូទ័ររបស់អ្នកបានផងដែរ។

5. នរណាៗក៏អាចបង្កើតកម្មវិធី និងហ្គេមអោយ Android ផងដែរ

សម្រាប់ប្រព័ន្ធប្រតិបត្តិការណ៍ iOS អ្នកត្រូវចំណាយលុយ 99 ដុល្លាក្នុងមួយឆ្នាំដើម្បីចុះឈ្មោះជាអ្នកអភិវឌ្ឍកម្មវិធី ខុសពី Android ដែលអ្នកមិនចាំបាច់ចំណាយលុយមួយកាក់មួយសេននោះទេ លុះត្រាតែយើងបង្ហោះកម្មវិធីចូល Playstore ដែលត្រូវចំណាយលុយ 25$ តែវាក៏មិនថ្លៃនោះទេ។

6. ស្លាកសញ្ញា Android ត្រូវបានរចនាចេញពីស្លាកសញ្ញាកន្លែងបន្ទប់ទឹក

ស្លាកសញ្ញារបស់ Android ត្រូវបានបង្កើតឡើងដោយអ្នកឌីហ្សាញសញ្ជាតិរុស្សី ដែលគោលដៅរបស់គេគឺត្រូវមានរចនាបថពាក់ព័ន្ធទៅនឹងមនុស្សយន្ត។ គាត់បានសម្រេចចិត្តយករចនាបថចេញពីរូបមនុស្ស ដែលគេបិទសម្គាល់នៅកន្លែងបន្ទាប់ទឹក មកច្របាច់ចូលជាមួយមនុស្សយន្ត ហេតុដូច្នេះហើយទើបបានឡូហ្គូយ៉ាងស្រស់ស្អាតបែបនេះមក។

សរុបសេចក្តីមក អ្វីដែលធ្វើអោយប្រព័ន្ធប្រតិបត្តិការណ៍នេះទទួលប្រជាប្រិយភាពដូច្នេះ ក៏ព្រោះតែវាមានលក្ខណៈបើកទូលាយខ្លាំង អាចដំណើរការលើឧបករណ៍បានច្រើនម៉ូត ច្រើនម៉ាក មិនទាមទារអ្វីខ្ពស់នោះទេ។ យ៉ាងណាមិញគូរប្រជែងមួយចំនួនកំពុងតែអភិវឌ្ឍន៍ខ្លួនអោយកាន់តែល្អ ផងដែរតួយ៉ាងដូចជា iOS, Windows Phone និង Tizen ជាដើម ហើយយើងក៏មិនអាចទាយដឹងថា Android នឹងនៅតែស្ថិតក្នុងតំណែងលេខរៀងទីមួយបានរហូតនោះទេ។

តាមដានព័ត៌មានផ្សេងៗពី Cambo Report

1. Android គ្រោងបង្កើតឡើងសម្រាប់បំពាក់លើកាមេរ៉ា