មានមនុស្សជាច្រើននាក់ណាស់ បានភ្ញាក់ផ្អើល នឹងកម្មវិធី Jailbreak iOS
7.1.x របស់ចិនដែលមានឈ្មោះថា Pangu
ព្រោះវាស្រាប់តែលេចចេញរូបរាងភ្លាមៗតែម្តង
ខណៈពួកគេរង់ចាំកម្មវិធី Jailbreak ពីប្រទេសនៅប៉ែកអឺរុប។
អ្នកប្រើប្រាស់មួយចំនួនបានសរសើរថាក្រុម Pangu
របស់ចិននេះពិតជាខ្លាំងមែនដែលអាចបំបែកកូដ iOS 7.1.x បាន
ប៉ុន្តែអ្នកប្រើប្រាស់មួយចំនួននៅមានមន្ទិលសង្ស័យច្រើន
ថាតើហេតុអ្វីបានជាក្រុម Pangu នេះ មានសមត្ថភាពខ្ពស់អាច
Jailbreak iOS 7.1.x បាន ពូកែជាងក្រុម Evad3rs (បង្កើតកម្មវិធី
Evasi0n), ក្រុម Redsn0w .. ទៅវិញ។
ជាការពិតណាស់ ក្រុម Pangu មិនមែនជាអ្នកស្រាវជ្រាវ រុករក
រូបមន្តក្នុងការ Jailbreak iOS 7.1.x នេះទេ
ក៏ប៉ុន្តែក្រុមនេះបានលួចរូបមន្តពីកំពូលអ្នកបំបែកកូដម្នាក់ដែល
មានឈ្មោះល្បីល្បាញគឺលោក Stefan Esser (ion1c)
ដែលរូបលោកជាអ្នកបំបែកកូដដ៏សាហាវម្នាក់។
កាលពីប៉ុន្មានអាទិត្យមុន
យើងធ្លាប់បានចុះអត្ថបទផ្សាយម្តងរួចហើយ ពីភាពជោគជ័យក្នុងការ
Jailbreak iOS 7.1.x ដោយ Stefan Esser (ion1c)
ប៉ុន្តែគាត់មិនបានបញ្ចេញកម្មវិធីនេះជាសាធារណៈទេ រហូតដល់ iOS 8
ដាក់អោយប្រើប្រាស់ជាផ្លូវការ។ គាត់បាននិយាយថា iOS 7.1.x
គឺមានចន្លោះប្រហោងមួយ ដែលអនុញ្ញាត្តិអោយយើង Jailbreak បាន
ក៏ប៉ុន្តែប្រសិនបើជាគាត់បញ្ចេញកម្មវិធីនៅពេលនេះ Apple
ប្រាកដជាបិទចន្លោះប្រហោងនេះជាក់ជាមិនខាននៅក្នុងប្រព័ន្ធ
ប្រតិបត្តិការណ៍ iOS 8 ជាក់ជាមិនខាន ដែលវានឹងខាតប្រយោជន៍ធំ។
អាថ៍កំបាំងចន្លោះប្រហោងនេះ គឺមិនបានបើកចំហរជាសាធារណៈឡើយ
ពោលមានតែអ្នកសិក្សាជាមួយ Stefan Esser ប៉ុណ្ណោះទើបបានដឹង។
ថ្នាក់ហ្វឹកហ្វឺនរបស់គាត់នេះ គឺដើម្បីបង្រៀនអ្នកអភិវឌ្ឍន៍
Software វិស័យ Jailbreak ដទៃទៀតអោយយល់ដឹងបន្ថែម និងវិធីបំបែកកូដ
iOS ក៏ប៉ុន្តែរូបមន្តនេះក៏បានបែកធ្លាយ ទៅដល់ក្រុម Pangu
ដែលទំនងជាលក់ដោយកូនសិស្សណាម្នាក់របស់លោក។
ត្រង់ចំណុចនេះបានបញ្ជាក់អោយឃើញថា Pangu បានលួចរូបមន្តរបស់ Stefan
ហើយយកទៅបង្កើតកម្មវិធី Jailbreak យ៉ាងតក់ក្រហល់
ដោយគ្មានគិតពីផលប៉ះពាល់ទៅថ្ងៃមុខអ្វី សោះឡើយ។
បន្ទាប់ពីបានដឹងថា Pangbu គ្រោងបង្កើតកម្មវិធី Jailbreak
នេះហើយ លោក Stefan Esser ក៏គ្មានពាក្យអ្វីនិយាយច្រើនដែរ
ត្រឹមតែពាក្យពីរ បីម៉ាត់ប៉ុណ្ណោះគឺ “ ប្រសិនបើជា Pangu
ពិតជាបញ្ចេញកម្មវិធី Jailbreak iOS 7.1.x នេះពិតមែន នោះ Pangu
ប្រាកដជាចង់បានផលប្រយោជន៍អ្វីមួយជាមិនខានដែលយើងមិនដឹង” ។
បន្ទាប់មកទៀត
គាត់ក៏បានបង្ហោះសារនូវការខកចិត្តមួយចំនួនផងដែរ
ដែលបង្ហាញពីការខិតខំប្រឹងប្រែងរបស់លោក ក្នុងវិស័យ Jailbreak
អស់រយៈពេលជិត 2 ឆ្នាំ
ប៉ុន្តែកូនសិស្សរបស់លោកបែជាលក់វាដោយគ្មានការសុំអនុញ្ញាតិពី
គាត់វិញ។
សរុបសេចក្តីមក ការបញ្ចេញកម្មវិធី Jailbreak iOS 7.1.x ដោយក្រុម Pangu
នេះមានផលប៉ះពាល់ច្រើនណាស់ ដល់អនាគត Jailbreak
ព្រោះអីក្រុមនេះបានប្រើចន្លោះប្រហោងដ៏អាថកំបាំងមួយ
ដែលវាអាចធ្វើអោយ Apple
បិទចន្លោះប្រហោងនេះនៅលើប្រព័ន្ធប្រតិបត្តិការណ៍ iOS 7.1.2 រឺ
7.1.3 និង iOS 8 ដែលរឹតតែពិបាកក្នុងការ Jailbreak ជាក់ជាមិនខាន។
ហើយអ្វីដែលគេសង្ស័យថាជាបញ្ហានៅលើកម្មវិធី Jailbreak Pungo នេះគឺ
PPSync ដែលវានឹងភ្ជាប់ជាស្រេចនៅលើ iDevice បន្ទាប់ពី Jailbreak
ហើយ។
Post a Comment